Sa interview sa DXDC RMN Davao kang Police Lieutenant Colonel Florante Retes, Officer-In-Charge sa Digos City Police Station, iyang giila ang biktima nga si Analiza Dalucan, 34 anyos, samtang ang suspek mao ang live-in partner niini nga si Lino Bandula, 60 anyos.
Saysay ni Retes nga samtang nagluto og paniudto ang babae, nagkalalis ang duha, ug didto na miabot sa punto nga mikuha og sundang ang lalaki ug gitigbas sa makadaghang higayon ang biktima diin naputlan kini’g ulo, gawas pa sa mga tinigbasan sa iyang lawas, hinungdan sa iyang hinanaling kamatayon.
Matud sa pulis nga kapila ka higayon matud pang nasakpan sa lalaki ang iyang kapuyo nga nakighilawas sa ilang silingan, rason sa iyang grabeng kalagot.
“Ang alleged (ingon) sa suspect nga naa daw siyay nakita nga gina-sexual intercourse iyang asawa ug lain, sa kalubin-an nakit-an daw niya. Unya kadto nga time, dili na daw niya kaya nga iluom-luom,” matud ni Retes.
Gilayon usab nga nadakpan ang suspect ug mag-atubang og kasong murder.
Dugang sa pulis nga walay bisyo ang lalaki ug wala usab kini nakainom sa dihang nahitabo ang krimen.
RadyoMaN Kirby Manzon
