Babae nga naanod patay sa Panabo, ‘mentally challenged’

Davao City – Nagsubo ang kabanay sa gidangatan sa ilang miyembro sa pamilya nga nakaplagang wala nay kinabuhi niadtong Sabado, Oktubre 14, 2023, tulo ka adlaw human kini naanod ug nawala niadtong Oktubre 11 sa Barangay San Roque, Panabo City, Davao del Norte.

Sa pakighinabi sa DXDC RMN Davao kang Ging Coranes, pag-umangkon sa biktimang si Lilia Trinidad, 60 anyos, sakit kaayo alang kanila ang gidangatan sa iyang iyaan ilabi na nga aduna kini mental illness.

Matud ni Coranes, duha ka mga bata nga namasol sa sapa dapit sa Barangay Upper Licanan ang nakakita sa iyang iyaan niadtong weekend nga wala nay kinabuhi, rason nga ila kining gi-report sa kapulisan.

Kahinumduman nga ayha nahitabo ang insidente, gikan sa bukid ug pauli sa ilang balay ang biktima sa dihang naabtan kini sa bul-og sa tubig sa sapa tungod usab sa kusog nga pag-ulan.

“Mutabok na unta sya. Gipugngan sya ni tatay kay sukdon pa ang kalawmon sa sapa. Nangita’g kahoy ang iyang tatay, si uncle. Human, pagtalikod ni uncle gikan sige’g pangita og kahoy, paglingi niya, nawala na si ante Lilia,” saysay sa pag-umangkon.

Sa pagkakaron, gipahilona ang patay’ng lawas sa biktima sa Panabo City.

RadyoMaN Kirby Manzon, RadyoMaN Erin Lumosbog