Babae nitabok sa pedestrian lane, gi-hit and run

Davao City – Nakahiagom og bukol ug bun-og sa paa ang usa ka babae nga nabanggaan og motor sa dihang kini patabok sa pedestrian lane gawas sa Bansalan Central Elementary School sa Poblacion, Bansalan, Davao del Sur, ala 1:00 sa hapon kagahapon, September 27, 2023.

Sa pakighinabi sa DXDC RMN Davao kang Michael Soriano, imbestigador sa Bansalan Municipal Police Station (MPS), iyang giila ang biktima nga si Lunecita Ortega, 42 anyos nga taga Purok Sta. Cruz, Poblacion, Bansalan.

Saysay sa imbestigador nga ala 1:00 sa hapon nahitabo ang pagbangga sa rider nga inay muhunong, niikyas hinuon. Apan alas 3:00 na usab sa hapon na-report ang panghitabo diin mismong ang biktima pa ang miadto sa presinto.

“Kung na-hold lang to sa mga tao didto, ang aksyon gyud ato, ma-isyuhan to’g TOP (Temporary Operator’s Permit) tong driver sa motor. pero ang mga tao lagi pud didto, igo ra pud nag-marites. Nitan-aw ra pud. Wala pud nitabang didto kang nanay,” segun sa imbestigador.

Sa pagsusi sa kapulisan sa closed-circuit television (CCTV) sa lugar, wala nakuhaan ang insidente. Adunay ubang CCTV apan dili usab functional.

RadyoMaN Kirby Manzon