Babaeng nalambigit sa ‘drowning incident’ sa Samal mipatim-aw sa DXDC, panghitabo giklaro

Davao City – Gihataga’g katin-awan ni Princess Faye David nga wala siya giluwas sa batan-ong namatay nga si Ritchie Nuyad human giingong mitabang kaniya sa usa ka beach resort sa Kaputian, Island Garden City of Samal (IGaCoS), Davao del Norte niadtong September 2, 2023.

Sa pakighinabi sa DXDC RMN Davao kang David, iyang gisaysay nga tungod sa kusog nga balod, nisulay siya’g pakitabang sa kauban sa biktimang nakabsan og kinabuhi, apan wala na siya natabangan kay aduna na silay laing gitabang.

Kahinumduman sa naunang report nga gikan sa Kaputian PNP, nagpakitabang matud pa si David ug ang upat ka paryente niini kay hapit na sila malumos diin nisuway og responde ang mga biktima.

“Na-timing lang pud nga duol mi atong namatay unya posible naay gitabang ‘tong grupo unya nihawa na sila kay naningkamot napud sila’g langoy ilaha. Posible nga naabot sa akoa ‘to iyang lawas. Mura’g ma-assume nila sa video nga gitabangan ko pero wala gyud mi nag-istorya. Wala mi nag gunitanay. Wala ko nagkapyot,” sulti niini.

Dugang ni David nga aduna usay kakulangan ang beach resort tungod wala silay gibutang nga mga personahe didtong dapita nga mao unta’y magbantay sa mga nangaligo aron luwas sa aksidente.

RadyoMan Kirby Manzon/RadyoMan Ivy Parido