Sa interview sa DXDC RMN Davao kang Police Major Mark Lester Jalon, ang station commander sa Baguio Police Station, giila ang biktima nga si Marione Atig.
Sumala sa pagsaysay sa bana sa biktima, nang-harvest sila og sili sa ilahang uma ug samtang pauli na, kalit lang aduna’y naligid nga bato ug natagakan si Atig hinungdan nga nahagbong siya sa sapa kauban sa bato ug naipit.
Nasayran usab nga ubos sa dalan mao ang sapa ug ang ibabaw nga bahin mao ang pangpang nga mao’y gigikanan sa bato.
Matud pa nga dili kaya sa bana nga itulak ang bato tungod sa kadako niini hinungdan nga niagi pa ang pipila ka minuto usa siya nakakita og makatabang niya ilabi na nga naa sila sa suok ang area.
Dugang ni Jalon nga andam usab silang mutunol og tabang sa pamilya sa biktima.
