Babaye nakit-an patay sa fishpond sa Monkayo, suspek ang mismong bana

Davao City – Nagpadayon karon ang imbestigasyon sa kapulisan sa Monkayo, Davao de Oro kalabot sa pagpatay sa usa ka babaye nga napalgang wala nay kinabuhi sa usa ka fish pond sa Purok 1 Barangay Inambatan, Monkayo, Davao de Oro.

Sa interbyu sa DXDC RMN Davao kang Police Staff Sergeant Angelito Arce, imbestigador sa Monkayo Municipal Police Station (MPS), giila niini ang biktima nga si Maricel Maravillas Huta, 34 anyos, residente sa Purok 4, Barangay San Miguel, Compostela, Davao de Oro. Samtang, ang suspek mao ang iyang mismong bana nga si Jesus Huta, 42 anyos, diin sila adunay tulo ka mga anak.

Sa inisyal nga imbestigasyon, bag-o lang gikan og abroad ang biktima nga bulag na sa iyang bana tungod sa dili maayo niining batasan. Apan niadtong higayona, nakigkita ang lalaki ug adunay gipatabang sa pagproseso sa iyang SSS ug PhilHealth sa Tagum City, Davao del Norte, rason nga giubanan usab sa iyang asawa.

“Kining igsoon sa (biktima) wala na kaangay sa (suspek) kay mamugos lagi unya wala na ganahi ilang igsoon sa bana. Unya ang babae, ang victim miingon man gyud nga “Sige lang kay last na man ni niya nga hangyo (nga) magpauban, magpatabang siya sa akoa,” sulti sa pulis.

Sa inisyal nga imbestigasyon, walay nakitang pinusilan o dinunggaban ang biktima, ug padayon pang ginasuta ang rason sa iyang kamatayon.

Kasong murder ang atubangon sa suspek nga padayon karong ginapangita sa otoridad.

RadyoMaN Kirby Manzon