May pamahog sa iya kabuhi si Marlyn Cerdenia, ang babaye nga nasapwan kaina sang aga (Mayo 28) sa kilid sang dalan sa Barangay Sapao, Dumangas, Iloilo.
Antis nasapwan nga patay ang biktima mga alas 7 sang aga, nagpa-blotter pa ini sa Molo police Station sang alas 5 sang kaagahon nga nakabaton ini sang pamahog.
Samtang, ginkumpirmar ni Police Major Engelbert Baquillo, hepe sang Molo PNP nga may mga blotter sa ila talatapan nga nagareklamo batuk kay Cerdenia.
Pinakaulihi nga blotter amo ang reklamo sang isa ka negosyante sang isda nga ginkuhaan sini sang kuwarta nga masobra 140,000 pesos para sa order nga bangrus kag pasayan.
Subong man, wala nagtupa ang nasambit nga mga produkto.
magluwas diri, may 11 pa ka iban nga nagpa-blotter kay Cerdenia matapos iya man ginkuhaan sang kuwarta kabaylo sang pag-proseso sang mga papeles apang wala man matigayon.
Sa karon padayon pa nga gina-imbestigahan sang Dumangas PNP ang pagpatay kay Cerdenia kon sa diin may yara na sila sang persons of interest nga posible nagpatay sa biktima.
