Roxas City, Capiz Dakop sang mga kapulisan ang isa ka snatcher nga babaye nga nagapang-edaron sang 50-anyos sa kilid sang suba sa Washington St., Roxas City.
Ginkilala ang amo nga snatcher kay Amparo Dizon residente sang Maayon, Capiz apang nagatenir sa Barangay Lawaan, syudad sang Roxas.
Sa panaysayon sang biktima nga si Lola Nenita Boluso 69-anyos sang Barangay Cagay, Roxas City nga nagikan ini sa Teodoro Arcenas Trade Center, kaupod ang duha ka mga apo kag buot kun tani magpadulong sa Roxas City public plaza sang nagpalapit ang suspek nga si Amparo kag nagpakilala sa tigulang nga iya paryente.
Nakig-estorya ang suspek sa biktima, apang lipod sa ihibalo ni Lola Nenita nga gina-amat amat na gali nga ginakuha ni Amparo ang iya wallet sa sulod sang iya nga shoulder bag.
Hinali nga nagdalagan ang suspek sang matalupangdan kag nagsinggit sang isa ka bystander nfa amo ang nanakita sa ginabuhat sang suspek.
Bangud sa presensya sang mga kapulisan sa lugar, gilayon nga ginlagas kag nadakpan si Amparo Dizon.
Nakuha sa suspek ang wallet sang tigulang nga may yara sang kuwarta. Sa karon nagapabilin sa kustodiya sang Roxas City PNP ang suspek.
