Davao City – Usa ka empleyado sa Development Bank of Philippines ang nidangop sa San Pedro PNP human nga gipangayuan og dakong kantidad nga kwarta nga nagpaila nga myembro sa New Peoples Army.
Ang complainant naila sa usa ka Phoebe Anne Manila, 28 anyos, residente sa Summerhill Village Lanang ning dakbayan samtang ang suspek nagpaila nga usa ka alyas Eugene.
Matud sa complainant, alas 9:45 sa buntag kagahapon human nakadawat siya og tawag gikan sa suspek ug namugos nga mangayo og kwarta.
Hinungdan nabalaka ang complainant ug nagpadangop sa San Pedro PNP aron usab niya paimbestigahan.
Samtang sa pikas bahin gisikop sa kapulisan sa San Pedro PNP usa ka 26 anyos nga lalaki human nadakpan sa kapulisan nga nagsimhotsimhot og rugby alas 10:30 kagabii sa dalang Camus ning dakbayan.
Ang dinakpan naila sa usa ka Rhian Apole, 34 anyos, residente sa Talikod Island Igacos, Davao del Norte, ug narekober ang duha ka plastik nga botelya nga dunay sulod nga rugby.
Ang dinakpan mag atubang og kasong kalapasan sa Presidential Decree 1916 kun Volatile Substance Law.
RadyoMaN Don Pulayao
