Ang biktima giilang Anabelle Elizagaque, 51 anyos, taga Block 5, Espino Subdivision, Brgy. Dumoy, Davao City.
Sa interbyu sa DXDC RMN Davao kang PMSg Noel Burden, Imbestigador sa Maa Police Station giingon niini nga padayong pa nilang ginasuta ang motibo sa pagpusil patay sa biktima.
Nahinabi usab sa DXDC News Team si Police Major Catherine Dela Rey, Spokesperson sa DCPO ug matod niini usa sa mga angulo nga ginatan-aw sa kapulisan ang pagkalambigit sa biktima sa investment scheme isip ahente sa RIGEN ug trading business ug giingong konektado nila ni Rico Garcia ug Paul Auditor isip business partner.
“Initial nga motive ang mga business transaction dati man daw na to siya kanang Agent sa RIGEN, initially mao palang to kay gina-imbestigahan paman namo,” sulti ni Dela Rey.
Kahinumdoman ang biktima samtang nag-atras sa iyang gimanehong SUV nga nagdala sa plate No. LAF 2329 gikan sa Power Asia Integrated Sales and Allied Services Compound apan pag-abot sa maong lugar kalit niabot ang duha (2) o tulo (3) ka wa mailhing suspek dayon og pusil sa biktima sa makadaghang higayon. Ang mga suspek daling misibat sakay sa ilang motorsiklo.
Narekober sa Davao City Forensic Unit (DCFU) ang tulo (3) ka piraso sa deformed slugs ug lima (5) ka fired cartridge cases (FCC) gikan sa kalibre .45 nga pistola ug personal nga mga butang sa biktima.
Ang patay’ng lawas biktima anaa gidala sa Cosmopolitan Funeral Homes, Camus, ning dakbayan sa Davao.
RadyoMaN Don Pulayao
