Kalibo, Aklan – Sa mayad eon nga sitwasyon ro sangka baby girl nga gin abandona ko anang sariling nanay sa kilid it karsada kung Magdalena Village, New Buswang, Kalibo, Aklan.
Suno kay Mrs. Romelet Villasis ro nakakita sa baby nga nagapamaktason imaw dahil naghatod imaw ko anang mga unga sa eskwelahan hay may napan-uhan imaw nga ginaeangawan ag sa anang pagtan-aw hay sangka eapsag.
Ro nasambit nga baby hay nakaputos sa mahigko nga sako it cemento.
Nagduhong imaw ag nagpainu-ino kung ano ro anang ubrahon sa unga. Maabo man nga mga tricycle ro naga agi ugaling uwa raya makita hasta nga may sangka naka motorsiklo rong nagpondo sa tungod gid nana ag rikato na ginsugid nga may eapsag nga ginbilin.
Ro nasambit nga naka motorsiklo hay uwa eon magduha duha pa, ginpaayos na rong baby ag ginpasakay si Mrs. Villasis sa motorsiklo ag ginhatod nanda sa Provincial Hospital.
Pag-abot sa hospital insigida gintatap it mga nurse ro baby, gin utdan it pusod ag dikato rayon nagtangis ro unga.
Sa makaron hay nagapabilin nga gina obserbahan ro baby, samtang ro nanay nga nag-aywan sa baby hay uwa pa makilaea.
