Davao City – Ning subling pag-abli sa klase karong tuiga, kitang mga katawhan nagmalaumon na usab nga unta ang mga naamguhan nato nga suliran kaniadto maresolba na karong tuiga: Kakulang sa mga magtutudlo, tunghaan, textbooks ug instructional materials ug uban pa.
Gawas niana, kita nanghinaut nga ang kapasidad sa pagpangempleyo ug pagpa-eskwela sa atong mga ginikanan atong masustinihan sanglit sakit kaayong palandungon nga bisan pa man sa mga programa sa gobyerno sama sa 4Ps, anaa lamang sa gihapoy mga batan-on nga nahikawan sa oportunidad nga makabaton ug de-kalidad nga pagtoon.
Ato usang gipangandoy nga unta ma-estabilisar ang presyo sa mga palaliton sama pananglit sa pagkaon, school supplies, presyo sa gasolina ug plete kun pamasahe sanglit kini man ang sagad panginahanglanon sa atong mga kabataan nga nagatungha matag adlaw.
Sa mga ginikanan, magtutudlo ug mga estudyante, kapit lang, laban lang: Magtinabangay ‘ta aron bisan pa man sa ‘di kalikayang mga suliran, makalahutay ‘ta sa atong tumong nga mahatagan ug bililhing pagbansay ug edukasyon ang atong mga tinun-an alang sa ilang mas hamugaway ug mas hayag-hayag nga kaugmaon!
RadyoMaN June Duterte
