Davao City – Gumikan sa nahitabong twin bombings sa Jolo Sulu Cathedral niadtong adlaw’ng Domingo, gimando karon ni Mayor Inday Sara Duterte-Carpio ngadto sa kapulisan ug sa Task Force Davao nga did-an na ang mga manimbahay nga makadala og backpacks sud sa mga simbahan samtang musimba.
Matod ni Public Safety and Security Command Center Chief Retired Army Major General Benito De Leon nga target sa mga teroristang Abu Sayyaf ug Ajang-ajang group ang mga simbahan kung asa dagsa ang mga manimbahay diin dili mapadaplin sa lokal nga kagamhanan ang posibilidad nga muhimo og susama nga atake ang mga terorista dinhi sa dakbayan.
Gipasabot ni de Leon nga buot lamang sa Presidential Daughter nga luwas ang mga dabawenyo gikan sa hulgang terorismo samtang musimba sud sa mga simbahan hinoon dili apil sa direktiba ang mga malls.
Segun niini nga walay angay kadhalokan ang publiko sa pag-adto sa mga simbahan tungod hugot ang ilang gipatumang seguridad gumikan sa igong puwersa sa kapulisan ug Task Force Davao sa mga nag-unang simbahan.
Kahinumduman patay ang 20 ka mga tawo apil na ang lima ka mga sundalo diin naangol usab ang kapin 100 ka mga manimbahay sa nahitabong pagpamomba sa Jolo Sulu Cathedral.
RadyoMaN Joel Viray
