Opisyal nga gin-endorso ni Pangulong Rodrigo Duterte si Bacolod City Mayor Evelio ‘Bing’ Leonardia sa pagka-alkalde sang syudad. Sa pag-atubang sang presidente pinaagi sa social media, ginklaro ni Duterte nga wala nalakip sa narcolist ang pangalan sang Mayor sang Bacolod.
Subong man ginpaathag ni Pangulong Duterte nga wala niya ginpangalanan si Mayor Leonardia nga isa sa mga politiko nga may angut sa illegal drugs. Dugang pa sang presidente nga gingamit lang sang isa ka “Mayor Monico” ang iya pangalan para paggwaon nga ginmitlang niya si Leonardia sa narcolist.
Pagklaro pa sang pangulo nga ginmensyunar lang niya si Leonardia sang ginsaysay niya nga ginpatawag niya sadto ang mga mayor sa Palasyo kun sa diin yara man didto ang alkalde sang Bacolod. Suno kay Duterte, gin-edit, ginbaliskad kag ginhalo-halo ang iya speech para maggwa nga ginpangalanan niya si Mayor Leonardia.
Sa ulihi sang video ginpahayag sang presidente nga suportado niya si Leonardia sa pagpadalagan sini sa pagka-mayor sang syudad.
Nahibalu-an nga magapadalagan liwat bilang mayor sang Bacolod City si Evelio Leonardia kag lakip sa mga kasumpong niya amo si Jocelle Batapa-Sigue, isa ka independent candidate nga ginasuportahan naman sang anay mayor Monico Puentevella nga nagapadalagan naman bilang congressman. /rcsg
