Davao City – Gimahay ni kanhi ANAD Party list Representative Jun Alcover si Pres. Rodrigo Duterte kung ngano nga mas migrabe pa og kamaot ang imahe sa nasudnong kapulisan karon.
Gitulisok ni Alcover si Duterte kung nganong mas misamot og kakulismaot ang dungog sa mga pulis karon ubos sa iyang administrasyon.
Gibatikos pa niini ang pamuno-nasud tungod sa mga pamahayag nga daw naghatag og kagahum sa mga pulis nga mupatay uban sa saad nga pasayloon sila kun makahimo sa ingon.
Malaumon si Alcover nga magmalampuson si DILG OIC Eduardo Año sa iyang misyon sa pagpabalik sa nindot nga imahe sa PNP aron mahibalik usab ang respeto sa katawhan ngadto sa mga awtoridad.
Matud ni Alcover, dakung tabang ang limpyo nga record ni Año sa iyang pagkasundalo niadto diha sa pagtangtang sa negatibong imahe sa kapulisan ug sa paglampos sa kampanya paglutos sa mga ‘police scalawags.’
Suma sa kanhi magbabalaod kinsa nanilbihan karon isip konsehal sa Sugbo nga sakto lang si Año nga mas pabug-atan pa ang silot sa mga pulis nga magbuhat og binuang sa ilang serbisyo.
Sa pikas bahin, si Ateneo De Davao University (ADDU) Prof. Airnel Ibarra nagsugyot nga aron mumaayo ang dagway sa PNP sa mata sa publiko, angay ilhon ang tawhanong katungod, sakto nga tratamiento sa mga suspetsado ug pagsunod sa ‘rules of engagement’ sa tanang mga operasyon.
RadyoMaN Joel Viray
