Badlungon nga mga manigarilyohay na-tiketan

Davao City – Sa tumong nga makab-ot ang smoke-free municipality, gipakusgan sa Pantukan Municipal Police Station, ilawom sa superbisyon ni PLTCOL Ranel B. Marquizo, Acting Chief of Police, ang hugot nga pagpangusog sa pagpapatuman sa No Smoking Ordinance sa lungsod.

Kini nga lakang nagtumong sa pagpanalipod sa katawhan batok sa peligro nga epekto sa sigarilyo.

Matud pa sa kapulisan, gidili ang panigarilyo sa tanang pampublikong lugar sama sa public transport terminal, merkado, eskwelahan, daplin sa dalan ug uban pang public areas nga tapukanan sa mga tawo.

Lakip usab, sumala sa gipagawas nga balaod, ang mga pribadong establisimyento sama sa restaurant nga walay gitakdang smoking area.

Ang masakpan nga mosupak sa ordinansa kasohan ug silotan subay sa balaodnong gi-endorso sa lokal nga panggamhanan. Tungod niini, gipangayo usab sa kapulisan ang kooperasyon sa tanang katawhan.

Gani, gipahinumdoman ang publiko nga ang aso sa sigarilyo dako og kadaut dili lamang sa manigarilyo, kundili apil usab ang second-hand smoke nga mas grabe pa ang risgo.

RadyoMaN Kareen Beltran