Kalibo, Aklan — Kapin sa P 180,000.00 nga balor it mga alahas ag kwarta rong nabuoe it mga manakaw matapos sinueod ag tinakawan rong sangka baeay ko Sabado it gabii sa Brgy. New Buswang, Kalibo, Aklan.
Ro nasambit nga baeay hay ginapanag-iyahan ni Mrs. Anabelle Trongoy Antonio, 52-anyos it nasambit man nga lugar.
Suno sa panaysayon it misis sa Kalibo PNP nga mga alas 7:00 it gabii ko Sabado halin sanda sa Gaisano ko anang unga ag apo ag tag pag-abot nanda sa andang baeay hay nakita nga nagakaeay-ag ro mga kagamitan it anang unga partikular sa second floor apisar nga naka lock man rong pwertahan.
Sa pag-usisa it misis nasayuran nga nagkaeaduea ro anang 2 ka gold nga kulintas nga may pendant, 1 nga gold nga pulseras, 1 nga gold wedding ring, 2 ka gold nga singsing, ag 1 pares nga gold nga aritos nga ginabana-bana nga mga P 100,000.00 ag kwarta nga nagabalor it P 80,000.00.
Sa makaron hay padayon pa nga gina imbestigahan ag gina follow up ko Theft and Robbery Section it Kalibo PNP ro nasambit nga insidente.
