Roxas City, Capiz – Yara na sa paghinakop sang Roxas Memorial Provincial Hospital ang isa ka bag-o bun-ag nga lagsap matapos gin-abandona sang iya iloy sa Urban Poor, Brgy. Tanza, Roxas City kaina sang aga.
Nasapwan sang mga residente ang lapsag nga babaye kag nakasulod ini sa plastic samtang nakatungtong sa tap-down nga tricycle sa atubang sang isa ka poluy-an sa nasambit nga lugar.
Ginapatihan nga pila pa gid lamang ka oras sang ginbun-ag ang lapsag bangud may mga dugo pa ini sang nakita mga alas 6:00 kaina sang aga. Gilayon naman nga nagresponde ang Capiz Emergency and Response Team – Aksyon Tabang kag gindala ang nasambit nga lapsag sa RMPH.
Sa karon ginpaidalom sa incubator ang lapsag kag yara naman sa maayo nga condition samtang nagapadayon naman ang imbestigasyon sang Roxas City PNP agud hibaluon kon sin-o ang iloy sini.
Ginpahayag ni Mrs. Lorelie Suelo, Center Manager sang Poluy-an sang Pagpalangga (Crisis Center) sang CSWDO nga paga-aktohan sang mga ini ang mga kinahanglanon sang lapsag samtang yara sa ospital.
