>
LOOK! Bag-o na District Collector nan Bureau of Customs sa Surigao del Norte miinkod na sa posisyon. Si Atty. Liza Sebastian an no-report na sa buhatan human na tagpulihan an kanhi nanguyo na si Lilibeth Mangsal na nabalhin sa Cebu City. Tag-angkon ni Atty. Sebastian, sunod-sunod na mga tigom an ija tagpatawag sa mga gingsakupan para sa paghimo nan dugang lakang para makuha nila an Target Collection na P19 milyones sa 2018, dili lamang sa Port nan SDN lakip isab sa subport nan Nasipit ug Bislig City. Tagkumpirmar niini, tagpanhingusgan kuman ni Commissioner Isidro Lapena an One Strike Policy na kon diin kon dili makuha an target nan mga District Collectors sa binuyan an mapailayom sa reshuffling process. Namahayag pa si Atty. Sebastian na sa pagpakisayod nija sa Port nan SDN waya makuha an target collection sa Pebrero resulta sa waya mobiyahe an barko na may karga na semento epekto sa bagyong Basyang, Marso na ini nakaabot. An sitwasyon sa SDN an nagdepende sa bulk and brick shipments, waya pay container shipments ugsa na gamay pa an koleksiyon kon ikumparar sa Cebu, CDO ug iban pa. Hinoon bisan kon ing-ana an sitwasyon, mohimo sila nan dugang stratehiya sa tibook Team nan Bureau of Customs SDN sa pakigtambayayong sa lain-laing stakeholders, mga brokers, porters ug iban ahensiya para ipaabot na an BOC an partner sa tinguha sa pagpalambo.
>
>
>
>
>
