Matapos sang 20 ka tu-ig nga pagserbisyu sa Bombo Radyo, opisyal na nga nagsugod sa pinaka-una niya nga appearance si Henry Lumawag sa primetime program sang RMN Iloilo ang “Straight to the Point” alas 6 sini nga aga.
Si Lumawag ang nakigbahin sa iya college classmate nga si Novie Guazo sa early morning time slot sang RMN.
Ang tandem sini kay Guazo, ang temporaryo lang, bangud sumogud sa masunod nga semana permanente na ini nga magapungko sa “Palabra De Honor” alas 6:45 tubtob alas 9 sang gab-i nga ginaprogramahan sang beterano nga broadcaster kag kagawad sang syudad nga si Rodel Fullon Agado.
Si Lumawag ang anay anchorman sang “Bombohanay Big-time” nga mabati-an alas 7:45 tubtob alas 9:30 sa aga sa Bombo Radyo ang hugot nga kasumpong sa programa ni Guazo nga sang ulihi gin-updan ni RadyoMan Regan Arlos. Siya ang ginkilala man bilang Best Anchorman kag Best Station Manager sa iya tion sa pihak nga waragwagan.
Si RadyoMan Henry nag-umpisa sa Bombo Radyo kaupod kay RadyoMan Novie kag classmate nila nga si RadyoMan Emerson Labrillaso, Mayo sang 1998. Nangin field reporter sa Bombo Radyo Roxas tubtob nangin correspondent sang House of Representatives sa Bombo News Center sa Makati City, nangin primetime anchorman kag station manager sa flagship station sa Iloilo.
Sa mensahe ni station manager Ronel Sorbito sang RMN Iloilo ginpahayag sini nga ang pagsulod ni Lumawag ang magapabaskog sa handum sang waragwagan nga makadulo-ong sang matuod- tuod kag patas nga pagbalita sa mga ilonggo sa panahon nga malapnagon ang fake news.
Para kay Lumawag, “Dream come true ang pag-reunite sa iya mga abyan sa industriya nga kabahin na sang numero uno nga waragwagan sang radyo sa Iloilo.
Sanday Lumawag, Guazo, Sorbito, kag Labrillaso ang lunsay alumni sang West Visayas State University sa College of Communications nga anay mga frontline anchormen sang Bombo Radyo.
Ang RMN Iloilo padayun nga nagaserbisyu sa mga tagpalamati nga ilonggo sa palibot sang Western Visayas sa sulod na sang pila na ka dekada kag nagpanguna sa pinaka-ulihi nga Nielsen Survey sang 2017.
Ini man ang nagapanguna sa may pinakadamo nga sumulonud sa news page sa social media nga nagmarka sa may pinakamadamo nga post engagements adlaw- adlaw kon ikumpara sa tanan nga local radio stations sa Visayas.
Nahibalu-an nga nag-trending sa bilog nga Pilipinas ang pinakauna nga broadcast coverage sang natigayun nga mapatay sang Philippine Drug Enforcement Agency-ang identified drug personality nga si Melvin Odicta Sr. sa Aklan kag ginasundan sang coverage sa major tourism event sa Dinagyang 2018.
