An mao nga terminal building in hinimo ha sulod la han tulo ka bulan nga may 10-milyones ka pesos nga budget tikang ha Borongan City Local Government (LGU) agud maka-akomodar hin 120 nga mga pasaheros.
Ha mensahe ni Borongan City Mayor Jose Ivan Dayan Agda, iya ginpasalamatan an bug-os nga City council sugad man an ira Besi-Alkalde nga bumulig agud matuman an mao nga proyekto.
Nanawagan gihapon hiya ha mga negosyante nga singabuton an opurtunidad hine nga mga flights agud mag invest ha negosyo.
“Seize this opportunity especially our businessmen here in Borongan. Please do not allow that one day we will be overtaken by other investors outside our province and our City,” siring ni Agda.
Naglalaum naman hi Eastern Samar Governor Ben Evardone nga an Borongan City in magin modelo ngan himoon nga susbaranan han iba nga lugar. Iya pa igindugang nga an Borongan Airport in simbolo hin progreso ngan kooperasyon.
“This structure will serve as a hope for other areas to be a model for development,” siring han gobernador.
Manunumduman, nagtikang an operasyon han Borongan Airport dida han December 19, 2022 ipinaagi han Philippine Airlines flight Borongan- Cebu- Manila Vice Versa gamit an 86-seat aircraft kada Lunes ngan Byernes.
Subay ha ginbuhat nga presentasyon ni Ruperto Ambil II, Borongan City flight operations chairman and city information officer, an Borongan Airport in nagkaada na hin 2,118 nga inbound passengers ngan 1904 nga outbound passengers tikang han December 2022 tubtub ha May 2023.
Nagkaada naman hin Memorandum of Agreement an Civil Aviation Authority of the Philippines (CAAP) ngan Borongan city government agud mai- develop ngan mamintinar an mao nga airport.
Samtang, naghatag naman gihapon hin tagsa-tagsa nga mensahe hin pagsuporta hira Eastern Samar Rep. Maria Fe Abunda, Japanese Consul General Hideki Yamaji, ngan CAAP Chief Manuel Antonio Tamayo nga nagtambong gihapon ha nasabi nga aktibidad.
