Davao City – Malaumon ang Mindanao Advocacy and Social Communication (MASC) nga makab-ot na sa dili madugay ang kalinaw sa Mindanao pinaagi sa kamugnaan sa usaka bag-ong Bangsamoro Government nga mohulip sa Autonomous Region in Muslim Mindanao kun ARMM.
Sumala ni MASC convenor Candido Aparece, Jr. usa ka maayong formula ang Bangsamoro government dinha sa pagtuldok sa pila na ka dekada nga bangi nga niulbo sa Mindanao.
Segun ni Aparece, nag-ugat ang kaguliyang sa Mindanao gumikan sa ‘historical injustices’ nga nasinati sa mga Muslim sukad pa sa panahon sa mga Kastila hangtud karon ug mao kini ang rason sa pag-alsa sa mga nag-rebelde kontra sa gobyerno.
Dugang ni Aparece, wala na’y laing solusyon nakita ang kagamhanan gawas sa pag-establisar sa Bangsamoro government nga gipangayo sa MILF ug sa ubang grupo sa mga Muslim aron makab-ot ang kalinaw sa Mindanao.
Tungod niini, gipadayag ni Aparece nga suportado sa ilang organisasyon ang new Bangsamoro structure sa ngalan sa kalinaw ug kalambuan alang sa mga Muslim, Kristiyano ug kalumaran denhe sa pulo sa Mindanao.
RadyoMaN Joel Viray
