Davao City – Patay sa buy-bust operation ang usa ka bag-ong gawas sa presohan human nakigpinusilay sa mga sakop sa Sasa PNP.
Gilusad ang operasyon kontra droga sa Kilometer 13 Panacan ning siyudad alas-2:00 sa kadlawon.
Giila ang suspek nga si Doke Lacorte, 27 anyos, ulitawo, walay trabaho, nagpuyo sa Km 11 Sasa.
Abtik nakamatikod ang suspek nga pulis ang mipalit og shabu kaniya maong mibunot kini og .22 kalibre sa pistola dayon pabuto tumong sa mga operatiba.
Apan daling nakabalos ang mga pulis nga maoy naghatud sa hinanali nga kamatayon ni Lacorte.
Kagahapong adlawa, hingpit na gi-claim sa igsoon ang patay’ng lawas sa suspek nga giilang sa tinuod nga pangalang Ruben Lacorte.
Sa dugang imbestigasyon, nasuta nga kanhi nang nasikop sa operasyon kontra droga ang suspek tuig 2016.
Apan niadtong buwan sa Pebrero karong tuiga, nahatagan og kagawasan si Lacorte gumikan sa pagbinuotan niini sulod sa Maa City Jail.
Imbes nga hingpit na unta magtarong sa kinabuhi si Lacorte kay nakagawas na kini sa presohan apan mibalik kini sa pagpayuhot sa iligal nga droga.
Nasayran nga si Ruben Lacorte gikunsiderang usa sa mga iladong drug personality ug nalakip sa drug watchlist sa Sasa PNP.
RadyoMaN Joel Viray
