Giatiman karon sa usa ka tambalanan sa Barangay Jagobiao sa dakbayan sa Mandaue ang usa ka batang lalaki nga bag-ohay lang gihimugso ug gibilin sa dumpsite sa Barangay Umapad sa maong syudad .
Ang hepe sa Mandaue City Social Welfare Services nga si Jessie Perez nibutyag nga giturn-over sa kapolisan kaganinang buntag ngadto sa ilang buhatan ang maong bata nga gibilin sa Umapad Dumpsite aron kini maatiman .
Ang bata napalgan sa usa ka tawo nga niagi sa dumpsite nga naglihok –lihok samtang gisud kini sa usa ka plastic bag , pasado alas 8:00 kaganinang buntag.
Ang nakakita sa bata niturn-over niini ngadto sa eco enforcer nga na-assign usab sa dumpsite ug mao na ang nagtugyan ngadto sa kapolisan.
Matud ni Perez gida nila sa Eversley Child`s Sanitatium and General Hospital ang maong bata tungod kay nag-yellow ang panit niini aron kini maobserbahan ug dugang .
Pangitaon sa CSWS ang ginikanan sa maong bata pinaagi sa pagtabang sa kapolisan aron pagsuta kung taga diha ra kini sa maong barangay o taga laing lugar ug igo lang nibilin sa bata sa dumpsite .
