Nakaplagan na lamang sa mga concern citizen ang usa ka bag-ong himugso nga bata nga gi-abandona sa iyang inahan sa kasagbutan nga bahin sa P3, Barangay 3, Malaybalay kagahapon.
Sa inisyal nga imbestigasyon sa Malaybalay City Police Station nasuta nga nakaplagan ang mao nga batang babaye alas 11:30 sa buntag, kagahapon, Nobyembre 20, 2019.
Matud sa kapulisan nga unang nakakita sa bata si Jhun Pescador nga lumulupyo taga- Lantapan, Bukidnon samtang nagbisita kini siya sa iyang anak sa Luna Boarding sa mao nga dapit.
Saysay ni Pescador nga nakuha ang iyang atensyon human nga nagpahibalo kaninay ang mga boarders nga aduna silay nadunggang hilak sa bata gikan sa usa ka bakanteng luna nga luyo sa mao nga boarding house.
Daling gisusi ni Pescador ang mao nga dapit ug didto iyang nakit-an ang usa ka buhi nga batang babaye nga giputos ug panapton ug gitabunan ug dahon sa gabi.
Gidala gilayon ang mao nga bata sa Bethel Baptist Hospital alang sa medical uban sa tabang sa City social welfare and development office.
Sa karon padayon nga gi-imbestigahan sa kapulisan ang posibleng pag-ila sa inahan sa mao nga bata nga gi-abandona.
