Davao City – Midangop sa kwerpo sa kapulisan sa Sasa ang usa ka bag-ong kinasal human nawad-an kini og dyes mil ka pesos nga nalikop gikan sa ‘prosperity dance money’ atol sa iyang kasal niadtong Enero 10 alas 8:30 sa kagabhion nga gipahigayon sa usa ka hotel sa may Lanang, Davao City.
Human sa upat ka adlaw nadiskubrehan ni Dawn Kareen Mancao nga nawala na ang dyes mil ka pesos sa prosperity dance money nga gibutang sa vault sa kwarto sa hotel nga giabangan sa iyang kasal.
Walay laing gidudahan si Mancao sa pagkahanaw sa kantidad mao ang ilang wedding coordinator nga si Karisma Kristy Villamor apan hugot kini nangulipas dihang gikumpronte sa biktima.
Apan gipamugos ni Mancao nga walay laing nagkupot sa card key sa ilang kwarto gawas lang matud pa kang Villamor hilabi pa nga gawas sulod kini sa lawak atol sa kasagsagan sa kalihukan.
Mas misamot ang pagduda ni Mancao dihang gisugilon sa iyang maid of honor nga si Grace Silva ug sa groom’s man nga si Rex Emmanuel Tiongson nga wala mosugot si Villamor nga iphon ang kwarta sa prosperity dance ug wala usab niya gipatrangka ang vault.
Sanglit wala napatug-an ni Mancao ang iyang wedding coordinator, igo na lang niya gipatala ang mao nga insidente sa Sasa PNP aron ma-imbestigahan ug masuta kung kinsa gayod ang nagkawat sa 10 mil ka pesos.
RadyoMaN Joel Viray
