Davao City- Gilingaw sa onse ka mga kandidata sa Hiyas sa Kadayawan ang mga mitan-aw ug misaksi sa ilang cultural presentation.
Gipahigayon ang cultural presentation kon talent competition sa Gaisano Mall of Davao, Bajada ning syudad diin gisugdan ang maong kompetisyon kaganinang alas 3:30 sa hapon.
Onse ka mga kandidata ang nagpakita sa ilang nagkadaiyang kultura diin ilang girepresenta ang onse sab ka mga tribo dinhi sa syudad sa Dabaw.
Giila ang mga kandidata nga sila: Ata Tribe – Edmalyn Macabilan Omo, Bagobo – K’lata Tribe – Stefanne Ann Luisen Alcaria, Bagobo Tagabawa Tribe – Jenfin Puroc Aguan, Matigsalug Tribe – Gifer Joy Roldan Aguio, Obu Manuvu Tribe – Mary Jane Eboc Maga, Iranun Tribe – Norhana Dalao Macasi, Kagan Tribe – Jerlyn Maminto Mancia, Maguindanaon Tribe – Norhaynie Aguindarat Mohomad, Maranao Tribe – Sittie Haya Lanto Cairoden, Sama Tribe – Joy Grace Orian Jihan, Tausug Tribe – Ainadhel Awang Blas.
Subay niini, nasungkit ni Ainadhel Awang Blas sa Tausug Tribe ang 2nd runner-up, 1st runner-up ang pambato sa tribung Maranao nga si Sittie Haya Lanto Cairoden samtang Best in Cultural Presentation si Jenfin Puroc Aguan sa Bagobo Tagabawa Tribe.
Nahinabi sa DXDC RMN Davao si Aguan sa Bagobo-Tagabawa Tribe diin sumala niya pulong sa Ginoo ang sekreto nganong midaug siya isip Best in Cultural Presentation gani nagpasalamat sab siya sa tanang misuporta kaniya ug hinaut niya nga padayon lang siyang suportahan karong umaabot nga coronation night.
“Ipadayon lang ang ilang pagsalig kay ako buhaton nakao ang akoang best. I just want to stay positive… And also have faith to our almighty God because kana gyod ang atoang most powerful (source) para makuha nato ang atoang gusto makuha”.
Human sa talent competition, atangan sab ang coronation night sa USEP Gymnasium and Cultural Center karong August 18, adlawng biyernes, alas 7 sa gabii.
Kasamang Renelyn Barbarona
