Davao City – Gilayon gipusasan sa mga otoridad ang usa ka baguhan nga drug pusher human gitunol ang sachet sa shabu sa pulis nga nagsilbing poseur buyer atol sa gilusad nga Joint Buy-Bust operation nga natigayon sa Purok 4, Brgy. Cebulano, Carmen, Davao del Norte.
Wala na nagpakita og pagsukol ang suspek ug malinawon nga mikuyog sa mga otoridad mao nga buhi kini napaslak sa prisohan o bin kaha masamdi atol sa hiniusang operasyon sa Carmen Municipal Police Station, RMFB 1, ug sa pakig-alayon sa PDEA 11.
Mikagat matud pa ang suspek nga si Jovel Villahermosa, 37 anyos, laborer, minyo ug nagpuyo sa purok Sta.Teresa, Cuambogan, Tagum City, Davao Del Norte sa lit-ag sa kapulisan ug misugot kini nga himoon ang transaksiyon sa nasangpit nga lugar.
Apan ang wala lang masayri ni Villahermosa nga pulis diay ang iyang gikasabot ug gikasa na ang usa ka anti-drug operation nga nagresulta sa pagkadakop sa drug pusher kinsa giila nga bag-ong drug personality sa probinsiya.
Nakumpiska gikan sa suspek ang lain pang sachet sa gitohoang shabu, 500 pesos nga mark moneyug uban pang kagamitan sa iligal nga kalihukan ni Villahermosa.
Hayan madugta sa prisohan ang suspek samtang magdagan ang kaso nga may kalapasan Sa Section 5 ug 11 sa Article 2 sa Republic Act 9165 kun Comprehensive Dangerous Drugs Act of 2002.
RadyoMaN Joel Viray
