Davao City – Gisuspende sa City Government of Davao ang klase gikan kindergarten hangtud sa post-graduate tungod sa bagyong Crising nga nakaapekto sa syudad ug sa ubang lugar sa Davao Region.
Sa Proclamation No. 1 Series of 2021 nga gipermahan ni Davao City Mayor Sara Duterte-Carpio, suspendido ang tanang lebel sa klase sa dakbayan apil na ang technical-vocational courses sa pampubliko ug pribadong eskwelahan sugod karong Biyernes (May 14, 2021) hangtud ugmang adlawa, Sabado (Mayo 15, 2021).
Gimando usab ang pagpatuman og full work-from-home arrangement sa tanang government offices sa maong duha ka adlaw lakip na ang government-owned ug controlled corporation, apan walay labot niini ang anaa sa security, health, social services and disaster offices nga nagapahigayon og emergency, disaster preparedness ug response duties, lakip na ang Coronavirus Disease 2019 (COVID-19) response ug vaccination activities.
Nasayran nga pipila na usab ka lugar sa Davao Region, ang nagpatuman og suspensyon sa klase ug trabaho sama sa pipila ka Local Government Units (LGUs) sa Davao del Norte.
Hugot usab nga naka-monitor karon ang City ug Barangay Disaster Risk Reduction and Management Office (DRRMO) sa rehiyon sa aksyon nga himuon sa posibleng epekto sa dili maayong dagan sa panahon.
RadyoMaN Kirby Manzon
