Davao City – Lima na ka tuig nakalabay sukad mikuso-kuso ang bagyong Pablo sa Davao Oriental ug Compostela Valley nga mikutlo og mga kinabuhi ug pagbanlas sa mga kabalayan butang lisod makalimtan sa mga survivors.
Suma ni Kinaiyahan Foundation Focal Person Betty Cabasares, ang bagyong Pablo konkreto nga ebidensiya sa climate change nga kaniadto ang Mindanao dili maigo og bagyo apan karon peligroso na sa kalamidad.
Ang mga survivors nagsulti nga wala nila damha mulihis og direksyon ang bagyong Pablo latas sa Oriental ug Comval gikan sa orihinal nga agian tunga-tunga sa kagabhion busa daghan ang wala naka-iktad.
Matud sa mga biktima nga daw sama ‘tornado’ ang bagyo tungod sa paghugyaw sa kakusog sa hangin nga dunay dala nga tubig dagat nga gibundak sa Oriental ug Comval resulta daghan sa mga balay ug mga tawo gipang-anod sa bulhog sa baha.
Dala sa tumang kumpiyansa daghan sa nanimuyo sa duha ka probinsiya wala nakalingkawas sa kabangis ni Pablo ug ang pagkagusnob sa mga lugar buhing kamatooran sa kakusog sa bagyo.
Pero kun aduna may usa sa basulon sa nahitabo sa Oriental ug Comval kana walay lain kundi ang kanhi nga gobyerno ni Benigno Simeon Aquino Jr. nunot sa kapakyas sa gitahasang ahensiya sama Philippine Atmospheric Geophysical and Astronomical Services Administration (PAG-ASA) sa pagpahibalo abot sa dagan sa super typhoon Pablo.
Kung wala lang unta naghinangaw sa trabaho ang mga personahe sa nasangpit nga buhatan daghan unta nakahikling sa mga pinuy-anan ug nabutang sa mga evacuation centers unta dili ingon niadto kadaghan ang mga namatay sa bagyong Pablo.
Matawag nga ‘blessing in disguise’ ang bagyong Pablo tungod sukad nahitabo kadto ang mga tawo karon aktibo na sa pag-adbokasiya sa kinaiyahan itandi sa wala pa mukuso-kuso ang kalamidad.
Segun ni Cabasares nga magsilbi unta nga pagtulon-an si Pablo nga kung ang kinaiyahan na gani maningil dili diay lalim tungod walay gyo’y makalingkawas sa delubyo ug kalamidad.
RadyoMaN Joel Viray
