BAHA | Mga barangay nga naapektuhan sang pagbaha sa Capiz bangud sang malawig nga pag-ulan nga dala sang Bagyong Usman, naglab-ot sa 87 – PDRRMO

CAPIZ – Naglab-ot sa 87 ang kabug-usan nga numero sang mga kabarangayan nagikan sa 13 ka mga banwa sa probinsya sang Capiz, ang ginbaha bangud sang wala untat nga pag-ulan dala sang Bagyong Usman sang nagligad nga adlaw sang Sabado. Samtang 174 ka pamilya naman ang nag-evacuate, matapos gintaup sang baha ang ila mga poluy-an.
Base sa pinakaulihi nga report sang PDRRMO-Aksyon Tabang, amat-amat na nga nagahubas kun sa diin 53 na lamang ka mga barangay ang nagapabilin pa nga ginabaha kag lima nalang ka pamilya ang yara sa gihapon sa evacuation centers.
Wala man sang narecord nga napatay ukon nasamaran sa malapnagon nga pagbaha.
Samtang naka-alerto sa gihapon ang Provincial Disaster Risk Reduction and Management Office, mga responding units, LGUs kag pila sa mga ahensya sang gobyerno.

Facebook Comments