SAN CARLOS CITY, NEGROS OCCIDENTAL – Ginluthang sang isa ka lalaki ang biktima bangud gid lamang sang ila sini paglina-lisay may mga las 12:16 kahapon sang udto sa San Juan St., Brgy. 5, San Carlos City.
Nakilala ang biktima nga si Ronnie Lebron, 23 anyos samtang ang suspek naman ginkilala nga si Gilbert Baritua, Alyas Dodong Sape, legal ang edad kag lunsay pumuluyo sang San Carlos City.
Sa imbestigasyon sang San Carlos City Police Station, nagbaisay ang suspek kag biktima tubtub nga nagbayluhanay na sila sang mga malain nga tinaga.
Nakibot na lamang ang biktima sang hinali siya nga gintiro sang suspek sang makapila ka beses kag naigo sa nagkalain lain nga bahin sang iya lawas gamit ang wala matumod nga armas.
Sa karon padayon nga confined sa San Carlos City Hospital ang biktima samtang ginapangita naman ang suspek sang nagpalagyo matapos ang krimen./dyHB BACOLOD
