Davao City – Bisan pa man daghan ang nangapply sa Kalayaan Job Fair nga gipahigayon niadtong Hunyo 12, 2018 subay sa Independence Day, padayon gihapong nagadawat og mga aplikante ang pipila ka mga kumpanya alang sa local ug overseas nga mga trabaho.
Sumala ni Erwin Cagape, Labor and Employment officer sa Public Employment Service Office (PESO)-Davao atol sa interview sa Serbisyong Straight to the Point sa DXDC RMN Davao, aduna gihapon silay inventory sa mga bakanteng trabaho sama nalang sa ipahigayon nga local recruitment activities sa PESO-Buhangin karong June 18-20, 2018 diin usa sa mga nangita og mga trabahante ang paablihay nga mall sa may Milan, Buhangin samtang sa June 20, 2018 sa PESO-Toril alang sa mga buot manarbaho sa call center.
Dugang niini, karong June 23, 2018 alas 9 sa buntag, adunay pagahimuong mini job fair sa Brgy Hall gym sa Toril District ug Brgy. Daliao Plantation alang sa mga nagapangita og trabaho diin construction company ug service cooperative ang mikumpirma nga mga employers sa maong aktibidad.
Gawas sa local jobs, aduna usab overseas special recruitment sunod semana nga ipahigayon sa PESO-Agdao diin sagad sa mga ginapangita mao ang service crews sa Saudi Arabia lakip usab sa PESO-Calinan diin nurses ang adunay bakante alang sa trabaho abroad.
Mamahimo usab bisitahon ang main office sa PESO-Davao nga nahimutang sa Recreation Center (Almendras Gym) Compound, Quimpo Blvd, Davao City o mutawag sa ilang contact number nga (082) 225 0956 alang sa dugang mga pangutana.
RadyoMaN Renz Barbarona
