Davao City – Gilauman karon sa Public Employment Service Office kun PESO-Davao nga daghang job seekers ang musalmot sa mga nakalinyadang job fairs karong bulan sa Disyembre.
Sa pakighinabi kang Erwin Cagape sa PESO-Davao atol sa interview kaniya ni RadyoMaN Misel Miral-Galve sa tulumanong Serbisyong Straight to the Point, gibutyag niini nga dunay job fair ang ilusad ugmang adlawa, Disyembre 7 sa UM Bolton Campus ning syudad sa Davao magsugod alas 8 sa buntag kutob alas 4 sa hapon diin adunay pulo ka mga kumpanya ang mupartisipar alang sa local jobs.
Dugang niini, aduna usab mini job fair ang gikatakdang pagabuhaton sa gym sa Brgy. Lasang karong Disyembre 14 samtang sa Disyembre 18 sa Megkawayan gym Calinan.
Gani nagapangita usab og mga trabahante ang usa ka dako nga retail mall og mga accounting assistant, treasury, HRD, merchandising ug supplies assistant.
Subay niini, mamahimong muadto lang sa PESO Davao main office nga nahimutang sa may Almendras gym compound sa Quimpo Boulevard, Davao City o mutawag sa ilang contact number nga 233-6890, i-like ug i-follow ang facebook page nga PESO Davao City ingon man magsend sa ilang email nga Davao_peso@yahoo.com alang sa uban pang mga pangutana.
RadyoMaN Renz Barbarona
