Balaan Bukid sa Isabela liwat nga pagadagsaon sang mga deboto suno kay Mayor Malabor

370

ISABELA, NEGROS OCCIDENTAL – Ginapaabot nga magadagsa ang linibo ka mga deboto sa Balaan nga Bukid nga nahamtang sa Brgy. Mansablay, banwa sang Isabela sining Semana Santa.

Suno kay Isabela Mayor Joselito Malabor nga ang mga deboto nga nagapadulong sa Balaan nga Bukid ang nagakadto didto agud nga magpatigayon sang ila tuigan nga panata.

Bangud sini, ginpasiguro ni Malabor nga handa ang iya banwa sa pagsug-alaw sang mga tumuluo kag bisita nga magapatigayon sang pilgrimage nga magasugod sa Huwebes Santo tubtub sa Sabado de Gloria.

Nahibaluan nga isa sa attraction sa Balaan nga Bukid amo ang cross nga nagataas sang kapin sa 45 ka tapak lakip na ang 14 Stations of the Cross.

Base sa inscription nga nahamtang sa semento nga foundation sang amo nga cross nagapahayag nga ini ang gin-balay sadtong May 3, 1964 kag gin-design sang American Engineer nga si John Dumas nga sadto naga obra sa Binalbagan-Isabela Sugar Company sa idalum sang Columban Fathers.

Suno sa history sini, na inspire ang amo nga engineer nga maghimo sang cross pinaagi sa iya asawa nga isa ka devotee sa Holy Rosary.

Tuig 1990 sang ginbutang ang 14 ka Stations of the Cross pinaagi sa inisyatibo ni Councilor Rudy Parcon.

Basi sa record sang nagligad nga tuig may yara sang bente mil ka mga tawo ang nakasulat sa listahan nga nagtaklad apang may yara pa gid sang kapin bente mil nga wala nakasulat bangud nagpunong ang mga nakapila nga tawo kag halos naga dut-anay na ang mga abaga sang mga nagatinaklad.

Sa karon, preparado naman ang mga medics nga magabantay sa ibabaw sang bukid, mga pulis kag BPAT members agud mabantayan ang mga magataklad sa sining simana santa kag ginapaabot nga sa sini nga tuig kapin singkwenta mil ang magapadulong sa balaan nga bukid.

Dugang pa ni Malabor nga madamo sang mga deboto nga nagapalipas sang gab-i sa sini nga lugar apang wala sang dapat nga kahangaw-an bangud may wala labot sa mga suga sa lugar, masanag paang krus bangud sang madamo nga lightings nga gintakud diri./DYHB NEWSROOM

Facebook Comments