TACLOBAN CITY – Matapos an 117 years han kuhaon han mga Amerikano an Balangiga bells kumo tropiyo han nahinabo nga Balangiga massacre dida han 1901, yana maibabalik na ini ha iya panimalay, ha Balangiga, Eastern Samar.
Ha interview han RMN kan Fr. Syrafen Tybaco, usa nga padi ha Balangiga church, an mga Balangiga bells in simbolismo han makusog nga pagtuo ha ginoo han mga waraynon.
“Ini in simbolo han pagigin brave han mga waray-waray ngan hilarom nga pagtuo ngan relasyon ha ginoo.”
Pagklaro pa ni Fr. Tybaco nga an mga lingganay ini diri panag-iya han gobyerno kundi gintatag-iyahan ini han simbahan pero nagpapasalamat an bug-os nga pwersa han simbahan ha gobyerno nga matapos an sobra usa ka siglo, nahibalik ini nga mga lingganay.
Samtang, damo na an nabisita nga mga turista ha Balangiga, Eastern Samar para ira mismo makit-an an pag-abot han Balangiga bells ilabi na an mga residente han nasabi nga bungto.
Ginlalauman nga ha Sabado in matambong mismo ha Balangiga, Eastern Samar para han turn-over ceremony hi Presidente Rodrigo Duterte.
