Sa interview sa DXDC RMN Davao kang Ken Naig, personahe sa MDRRMO Sta. Maria, iyang gibutyag nga sa Jassi Street, Barangay Poblacion, Sta Maria, adunay punoan sa kahoy nga natumba nga miresulta sa pagkadamyos sa bahin sa usa ka balay, apan wala ra usay naapektuhang tawo sa sulod. Aduna usab punoan sa lubi nga natumba sa lugar human kini nalukat.
Samtang, laing ponoan sa kahoy nga natumba sa dalan sa Tibungoy, Sta. Maria nga dali usab nga giaksyonan pinaagi sa clearing operation aron dili makaapekto sa mga motorista.
Matud sa MDRRMO personnel nga ilaha kanunay nga ginaigmat ang mga residente sa barangay partikular na kadtong nahimutang sa upland areas, ilabi na panahon sa mga pag-ulan ug kusog nga hangin.
“Tingala gani sila nganong naingon ani ni’g kalit nga sige’g hangin-hangin. Nag-advise lang mi nga dili lang gyud magkumpyansa. Kung tan-aw nila nga lain na (ang panahon), magbakwit gyud,” saysay ni Naig.
Mamahimong i-contact ang MDRRMO Sta. Maria sa numerong 0907-960-6428 panahon sa emerhensiya.
RadyoMaN Kirby Manzon
