Balay nilang 2nd District Congressman Rufus Rodriguez, gilabayan og granada!

Ang balay nilang Congressman Rufus Rodriguez sa Brgy. Nazareth ning syudad sa Cagayan de Oro. Photo by: RadyoMaN Andy Coco

Gilabayag og granada ang balay nilang Cagayan de Oro 2nd District Congressman Rufus Rodriguez kaganihang mga ala una ang takna sa kadlawon diha sa Brgy. Nazareth ning syudad.

Gibutyag sa otoridad, nakabantay ang care taker sa maong panimalay nga naay nitugpa sa ilang lawaak nga murag bato.  Sa dihang iyang gisusi nakita niya ang usa ka granada ug pagtuo ni-ining dulaan lamang kini.  Apan sa pagpudyot ni-ini namatikdang bug-at matud pa ang nasangpit na nakitang granada.  Kalit kining midagan sulod sa ilang kwarto dayon nagpaabot nga mobuto.  Swerte na lamang nga wala mahinayon ang gilaumang pagbusikad sa maong granada.

Dali kini mitawag sa mga tanod nga nagronda sa maong dapit ug daling gitawag usab sa mga kapulisan sa Police Station 9, Nazareth ning syudad sa Cagayan de Oro.


Nasuta sa kapulisan nga usa ka tinuod nga granada ang gilabay sa panimalay nilang Rodriguez.  Sa pagkakaron, padayon pa ang ilang gihimong imbestigasyon kung unsay motibo sa paglabay og granada sa balay sa maong kongresista.

Sa laing bahin, matud pa ni Congressman Rodriguez nga posibleng pulitika ang motibo sa maong insidente sanglit nagpadayag kini sa iyang interest nga modagan pagka mayor ning syudad sa umaabot nga May 2022 Elections.

Facebook Comments