Balay sa langyaw gipaarakan

Davao City – Nabuslot agi sa bala ang pipila ka parte sa balay sa langyaw sa Country Homes, Cabantian human gipaarakan sa duha ka armado nga nakasakay og motorsiklo nga nahitabo pasado alas-7:00 sa gabii.

Maayo na lang kay walay naigo ug samdan sa pagpa-ulan sa duha ka suspek sa balay ni Ian Fidoe, British national.

Matud sa caretaker nga si Victor Mantejas nga samtang nag-istorya ang iyang agalong langyaw ug ang asawa niini nga si Rates Cadiz aduna matud pa’y nagbahis-bahis nga motor sa ilang pinuy-anan.


Ug wala dangti og dugay nabati na lang nila ang sunod-sunod nga buto sa pistola apan maayo na lang kay abtik sab sila nakabantay og nakahupo maong walay ni usa kanila ang naigo kun nasamdan sa pagpamanhig.

Paspas mikagiw ang mga suspetsado sakay sa ilang motor.

Lima ka bala sa basyo sa punto 45 nga pistola ang narekober sa mga imbestigador sa Buhangin PNP.

Subay sa dugang pakigsusi sa mga otoridad, kapin usa na ka tuig buwag ang magtiayon diin buot na unta sa langyaw nga ibaligya ang ilang balay apan wala muuyon ang asawa nga Pinay niini.

RadyoMaN Joel Viray

Facebook Comments