Dipolog City – Giransak sa wala pa mailhing mga kawatan ang balay nga gipanag-iyahan sa usa ka pulis nga nahimutang sa Purok Bogainvilla Brgy. Sicayab, dakbayan sa Dipolog.
Nagpatala sa Dipolog PNP ang biktima nga si SPO4 Ruel Imbang, 47 anyos nagpuyo sa Barangay Sicayab ug kasamtangan nga na-destino sa Aviation Security Group 9 sa Pagadian City Airport Police Station.
Sa imbestigasyon sa Theft and Robbery Section sa Dipolog PNP, alas 9:45 sa buntag dihang nauli ang maong pulis uban sa iyang pamilya, nadiskbrehan nga nagkatag na ang mga butang sa ilang dressing room.
Sa dihang gisusi niini, nahanaw na ang iyang kolor itom sling bag nga dunay sulod salaping cash nga mubalor 20 mil ka pesos, usa ka bulawang kwentas nga mokantidad sa 15 mil ka pesos ug ang Glock 17 9mm pistol nga service firearm isip tinugyanan sa balaod may serial number PNP0322.
Nasayran nga miagi ang wala pa mailhing kawatan sa luyong bahin sa balay human nilayat sa sementadong paril, didto gidu-ot ang usa ka unit sa aircon og nilusot sa bungag.
Dihang nakasulod ang kawatan gipanguba ang door knob sa mga poltahan ug gipang utingay ang gamit sa dressing room kon asa nakuha ang sling bag.
Nagpadayon pa ang mga pulis sa Dipolog sa paghimo’g follow up investigation sa maong kaso sa pagpangransack.
