Balayanihan gilusad alang sa Masara landslide survivors

Davao City – Nanawagan karon og volunteers ang lokal nga panggamhanan sa Davao de Oro alang sa himuong Balayanihan Build 2024, diin kini alang sa mga survivor sa nahitabong landslide sa Barangay Masara, Maco, Davao de Oro.

Matud ni Davao de Oro Vice Governor Jayvee Tyron Uy, kini nga inisyatibo nagtumong nga mahatagan og bag-ong panimalay ang mga residente sa Masara nga naapektuhan sa kalamidad.

Nahimo sab kining posible pinaagi sa hiniusang paningkamot sa nagkadaiyang indibidwal, grupo, ug mga organisasyon nga nagtan-aw sa kahimtang sa mga Masara landslide survivors.

Sulti ni Uy nga importante nga matabangan ang nahisgutan nga makatukod sa ilang mga pinuy-anan, diin nasayrang wala na gitugotang makabalik pa sa lugar ang mga residente kay kini delikado na sa kalamidad.

Mamahimong mag-sign up online aron mahimong volunteer o mo-contact sa 0975-313-9044.

Ang Balayanihan himuon sa Barangay Panibasan, Maco, Davao de Oro gikan July 7-14, 2024.

RadyoMaN Kirby Manzon