Pagadian City – Andan ang kapulisan sa probinsya sa Zamboanga del Sur ug Syudad sa Pagadian sa unang adlaw sa pag-abli sa klase karong buntaga.
Nagpakatag og Balik Eskwela Safety Tips ang kapulisan aron makalikay sa bisan unsa nga krimen ang mga estudyante nga mosugod na pagtungha alang sa School Year 2019-2020.
Pahimangno sa kapulisan nga magpabilin lang sa tulunghaan kon wala pa moabot ang sundo, likayan ang pakigsulti sa dili tawong kaila, angay ipahibalo sa ginikanan kun dunay lakwon ug ipahibalo kinsa ang kauban, likayan usab pagpagabi-i sa dalan, mas makaayo kun dunay kauban sa pagpauli gikan sa tulunghaan, sayron asa nahimutang ang pinadool nga police station, mag-binantayon sa dala nga mga butang ug maniid sa palibot.
Mahinumduman nga niadtong nakalabay nga semana gitagbo ni Police Col. Redentor Retusto ang tanang hepe sa 26 ka munisipyo ug usa ka syudad sa probinsya og didto gituki ang ang Security Plan sa Balik Eskwela 2019.
Sa kasamtangan walay nadawat nga bahad sa seguridad apan pabiling naka-alerto ang otoridad.
