Davao City – Mga kasama hingpit nang mibiya ang tuig 2017 ug karon bag-ong tuig na 2018 agi’g balik-lantaw sa mga dagkong panghitabo sa nakalabay’ng tuig adunay mga kalampusan ug natuman nga mga saad sa kasamtangang administrasyon ni Pres. Rodrigo Roa Duterte, apan dunay makapasubo usab tungod sa mga kalamidad nga nasinatian sa nasud.
Kini ang paghanduraw ni Couples for Christ Felipe regional coordinator Noel Dacalos sa mga katikaran nga iyang personal nga nasinatian nga nakahatag kaniya og kadasig ug bili sa maong tuig. Matud ni Dacalos, dunay mga promisa ang presidente nga sa kinaulihan napatuman sama na lamang sa mga bulisan nga iyang gisaad kaniadto ingon man ang dagan sa stock market nga nakatabang kanila.
Adunay panultihon nga kung dunay kalipay duna puy kasakit nga nasinatian ang nasud sama sa mga kalamidad gani ang pinakaulahi nga nakaapekto dinhi sa syudad sa Davao human makasinati ug pagbaha tungod sa Bagyong ‘Vinta’ ingon man ang sunog sa usa ka mall nga mikutlo ug kapin 30 ka mga kinabuhi nga wala na makaabot sa Pasko. Giingon sa Couples for Christ regional coordinator, kining tanan dili malikayan nga masinatian sa matag tuig nga maoy naghatag kanato og leksyon, giya alang sa hugtanong pagpangandam aron sa mga umaabot nga katalagman makalikay na sa dakong destroso ug pagkalas sa kinabuhi.
Alang kang Dacalos, ang nakalabay’ng tuig human sa mga eksperyensang nasinatian nakahatag kaniya ug leksyon kung unsaon pagdawat ug pagpasalamat luyo sa dili maayo ug maayong mga panghitabo tungod niini sa pangkinatibok-an sa iyang kinabuhi nga iyang nakat-onan matud niya diha ka lang magtutok sa mga butang nga imong makaya ug dili sa uban nga anaa kanila, makigdait ug matinabangon sa mga nagkinahanglan sa tabang.
RadyoMaN Bernard Pantallon
