Pebrero 10, 2017, isa ka tuig na an milabay, isa ka makusog na pagtay-og an nahitabo sa probinsiya nan Surigao del Norte, an 6.7 magnitude na linog. An Surigao City sanan lungsod nan San Francisco (Anao-aon) an may hamok na *kadaut *sa inprastraktura human na nasinati an Intensity-7 na kakusog sa paglihok sa lupa. Walo-ka-tawo an nakabsan sa kinabuhi . Nasinati isab an way koryente , tubig, lakip an wayay biyahi sa eroplano tungod sa nadaut na runway sa Surigao Airport.
KAAGI
Alas 10:03 sa gabie nan Pebrero 10 sa milabay na tuig ,nasinati nan mga residente an kusog na dahunog na tingog daya an kusog na paglihok sa lupa. Kahamokan sa mga tawo migawas na waya kaandam sa ila panimayay, nagsinggit, nalisang sanan puno sa kahadlok dajon jagan pasingud sa Capitolyo nan probinsiya kun diin medyo taas-taas na lugar, para maluwas sa tagkahadlokan na Tsunami.An Capitol napuno nan mga sakyanan ug mga tawo na gikan sa nagkalain na barangay sa syudad nagtipon-ok sa kangit-ngit kay nasinati man an total blackout sa koryente. An iban, nakabitbit pa nan mga gamit nila.
Sa kahamok na mga nangasamad napuno isab an mga ospital sa pag-atiman nan ila mga pasyente. Sumaya sa Philippine Institute of Volcanology and Seismology, miabot sa 200 kapin ka mga afterschocks an nasinati sa probinsiya human an 6.7 mag. na linog.
PAGKASILOM
May mga residente na waya nay naabtan sa ila mga panimalay kay totally-damaged an mga huy-anan nan mga ini; swerte an iban na an ila mga gamit ra an mga nangabuak.Luoy isab an pipila ka mga establismento na washed out tanan mga gamit og dili na mapuslan.Miabot sa pipila ka milyon ang mga nahatag na mga donasyon, relief goods, ug tabang pinansyal para sa mga biktima nan linog, gikan sa mga nagkalain-laing pribado na organisasyon. Lakip an tabang sa mga Local Government Units sa nasod ug nasyunal. Nagsunod sab sa pag-abot si Presidente Rodrigo Duterte sanan si Vice-Pres. Leni Robredo na nag inspection sa mga nangaguba na building, eskwelahan, tulay sanan sa sitwasyon nan mga biktima .
Isa sa mga nangadaut amu an mga tulay na nahugno sa San Francisco SDN ,mga eskwelahan pareho nan Surigao State College of Technology, mga public school bldg. sa kaislahan sanan an San Nicolas High School sa lungsod nan San Francisco .(RadyoMaN Winston Ensomo)
