Balitang Dugtungan, Una, Balita gikan sa RMN Davao:
Kasong rape batok sa CSU personnel wala giduso
Davao City – Girelease na kagahapon sa buntag gikan sa selda sa San Pedro PNP ang usa ka personahe sa Civil Security Unit kun CSU human matud pa nga dili na pursigido mupasaka og kasong sexual assault ang iyang asawa.
Gitakda kagahapon nga i-file sa San Pedro PNP ang kaso apan mihangyo ang asawa niini nga dili na idayon ang pagpasaka og kaso batok sa iyang bana rason nga iya nang nadawat ang nahitabo sa iyang anak ug napasaylo na niya ang iyang bana.
mahinumdoman niadtong milabay adlaw human nga midangop sa kapolisan ang asawa ug iyang gireklamo ang iyang bana kinsa milugos sa iyang step daughter nga menor de edad kinsa nagpangidaron pa lamang og 14 anyos.
Balita gikan sa RMN General Santos:
Personal Grudge-anggulong gitutukan sa Polomolok PNP sa pagpamusil sa usa ka purok Chairman
General Santos City–Nagpadayon pa ang gihimong imbistigasyon sa Polomolok PNP sa pagpamusil ngadto sa purok Chairman sa Purok Maypagkakaisa, Barangay Lumakil, Polomolok, South Cotabato, nga si Randy Bisaya kansa una nang gipusil patay sa wala pa mailhing suspetsado niadtong adlawng Sabado.
Matud ni Police Sr. Inspector Romeo Albano, deputy Chief of Police sa Polomolok PNP nga sa karon ila pang gipalawman ang ilang imbistigasyon sa posibling motibo sa pagpatay kang Bisaya.
Kahinumduman nga gikan nagpabulkit ang biktima sa ligid sa sakyanan nga iyaha sa Polomolok PNP ug pauli na unta sa ilang panimalay sakay sa iyang motorsiklo dihang kalit siyang giharang sa duha ka mga suspek nga nakasakay usab sa motorsiklo sa may Purok Maypagkakaisa dayon gipusil igo sa iyang ulo nga hinungdan sa iyang kamatayon.
Usa sa mga ginatan-aw nga anggulo sa kapulisan ang bahin sa personal away.
Nasayran nga adunay kaso kaniadto ang biktima sa Polomolok PNP kalabutan sa RA 9162 kon violence against women and their children.
Samtang gikaingong apil usab matud pa kini sa listahan ni Pangulong Rodrigo Duterte sa mga nalambigit sa iligal nga droga.
Balita gikan sa RMN Butuan: Reklamo batok SWAT miabot na sa Region
Niabot na matud pa sa buhatan ni PNP Caraga Regional Director Police Chief Supt. Gliberto DC Cruz ang daghang reklamo batok sa dili maayong taras nga gipakita sa mga sakop sa SWAT- Butuan diha sa pagpahigayon ug Oplan Sita sa mga motorista.
Gireklamo sa mga motorista ang estilo sa SWAT nga mokalit lang ug harang sa nagdagan nga motor ug singkahan ang nagmanehu niini kung mangayo ug drivers’ license ug OR/ CR sa motor.
Ulahing nagreklamo ang wala nagpailang kolektor didto sa brgy. Pangubugan tungod kay labihan niya’ng lisanga sa dihang kalit siyang gi-ambakan sa SWAT diin ang iyang kalapasan mao ang wala pagsuot ug helmet.
Matud ni PCSupt. Cruz nga iya nang gipatawag ang team leader ug ang hepe sa BCPO aron ipa-explain sa maong mga reklamo.
Balita gikan sa RMN Iligan: Hepe sa kapulisan sa nasud nga si Gen. Albayalde mipaklaro nga temporary lang ang ilang pagbutang sa bag-ong OIC Director sa kapulisan sa Iligan
Gipaklaro sa hepe sa kapulisan sa nasud nga si General Oscar Albayalde nga temporaryo pa lang ang paglingkod isip OIC City Director sa Iligan ni Police Senior Superintendent Rene Solidarios nga mihulip ni Police Senior Superintendent Manuel Alvarez.
Sukwahi kini sa pamahayag ni Vice Mayor Jemar Vera Cruz nga wala magtamod sa balaod ang pamunoan sa kapulisan sa nasud.
Gibutyag ni Albayalde nga anaa pa gihapon sa Local Chief Executive ang gahum nga makapili kun si kinsa ang iyang ipalingkod isip PNP City Director.
Hinungdan nga nakurat si Albayalde sa impormasyon nga adunay gihimong protesta ang kagamhanang lokal batok sa kapulisan pinaagi sa pagbawi sa mga patrol cars nga ilang na-donate sa kapulisan sa iligan.
Nagtoo si Albayalde nga wala silay gisupak nga balaod subay sa ilang paghulip sa pwesto ni Alvarez.
Balita gikan sa RMN Malaybalay: 88th IB commander, gihupay ang kabalaka sa publiko kalabot sa hulga sa mga NPA
Gisiguro sa 88th Infantry Battalion kon 88th IB, Philippine Army nga peaceful ang lungsod sa San Fernando human sa natala nga mga panag-engkwentro tali sa kasundaluhan ug grupo sa New Peoples Army kon NPA ning nakalabay nga semana.
Sa interview sa RMN Malaybalay ngadto kang Lt. Col. Randy Remonte, ang commanding officer sa 88th IB gibutyag niini nga malinawon na ang Brgy. Magkalungay nga maoy sentro sa engkwentro, apan giklaro ninii nga nahitabo kini didto na sa lasang nga dapit ug layo na sa komunidad.
Bisan ang mga lumulupyo matud pa sa mao nga dapit ang makasulti nga nagbag-o na ang sitwasyon sa mao nga dapit.
Una gibutyag ni Col. Remonte nga adunay nahitabo nga engkwentro sa Barangay Magkalungay lungsod sa San Fernando niadtong Oktubre 29 ug 30.
Nagpadala matud pa siya ug mga sundalo sa mao nga lugar tungod sa sumbong sa pipila ka katawhan didto nga adunay mga presensiya sa Guerilla Front Committee 6 sa NPA nga planong musulod sa kasikbit nga Sitio aron mangayo ug suporta sama sa pagkaon ug bugas.
Dugang sa commanding officer nga pagka-ugma bisan ni-atras na ang mga NPA sa boundary sa Agusan apan na-engkwentro pa gihapon kini sa tropa sa kasundaluhan.
Una nang gikataho sa 88th IB nga nakarekober sila ug mga improvised explosive device (IED) human sa duha ka managsunod nga engkwentro.
Gawas sa mga IED, nakarekober usab sila ug detonating cord ug ka walay sulod nga gas containers ug uban pang personal nga gamit sa mga NPA.
Walay nasamdan sa panig sa kasundaluhan apan nagtoo sila nga adunay mga nasamdan o kaha namatay sa grupo sa NPA.
