Davao City – Tungod matud pa sa dynamite fishing ug starvation ang hinungdan sa pagkamatay sa usa ka 10.4ft long female Pygmy Sperm Whale nga napalgan sa may Calderon Seaside Kilometer 22, Budbud Bunawan, Davao City.
Kini matud pa kang D’Bone Collector Museum Director ug Davao based American Marine Biologist Darrel Blatchley atol sa interbyu sa RMN Davao.
“Kung dynamite fishing bali pagbuto sa dynamite it ruptures there eardrums bali ang mga whales and dolphines mao niy ilang ginagamit para pagpangita sa ilang mga pagkaon. So kung ruptured na ang ang eardrums murag mabuta dili na sila makakita sa ilahang mga pagkaon nga isda ug nukos,” segun ni Blatchley.
Sa gihimong necropsy gibutyag ni Blatchley nga walay nakitang mga basura sulod sa namatay nga dakong isda apan adunay a narekober nga fishing hook ug nylon.
Matud ni Blatchley gisulayan pa og balik sa mga residente ang maong pygmy sperm whale sa dagat human kini nakita niadtong Sabado apan namatay kini niadtong Dominggo sa buntag.
Tungod sa kondisyon sa maong whale gamay ra gayod ang tsansa nga mabuhi kini human kini napalgan sa baybay.
Pahimangno niini sa publiko nga ang mga marine species sama sa butanding, dolphines ug mga pawikan protektado kini ubos sa balaod ug dili kini pweding katayon.
“Kung makakita mo ani sa mga baybay i-contact dayon ang 911 or Bureau of Fisheries para matabangan kini aron mabuhi pa. Kung patay ayaw i- ‘chop-chop’ aron kaunon. Bawal pod ni kaunon kay naay posibilidad nga naa ni silay mga sakit ug harmful pod ni sa mga tao,” matud ni Blatchley.
Kahinumduman laing tulo usab ka mga marine mammals ang napalgan karong tuiga dinhi sa Davao Region diin niadtong Enero usa ka dolphin ang patay nga nakita nga nasangit sa pukot, niadtong Pebrero usa ka babaeng pygmy sperm whale usab ang nidagsa ug niadtong Marso, tibuok kalibutan ang nasubo ug nakugang tungod sa 40 kilos nga plastics nga nakuha sulod sa tiyan nga maoy gikamatay sa 15.4 feet nga juvenile Cuvier Beaked Whale.
RadyoMaN Aimee Guinita
