Davao City – Napuno sa hubag ang nawong sa usa ka ginang human kulataha sa iyang bana nga palahubog pasado alas 3:00 sa kadlawon sa ilang pinuy-anan sa Sasa, Davao City.
Nasuko matud pa ang asawa nga si alias “Hanna” kay hubog miuli ang bana nga si alias “Bugoy”, hinungdan nagkalalis ug nag-away ang duha.
Katarungan sa biktima nga walay misis malipay sa iyang mister nga kadlawon nang miuli ug hubog pa.
Sa tantong lalis sa magtiayon, kalit lang gisumbag ni Bugoy ang nawong sa biktima sud sa pila ka higayon resulta sa mga labhag ug hubag sa nawong, tungod kay lisod na kontrolon ang hubog nga bana, nanawag na og pulis ang ilang mga kauban sa panimay nga paryente ra usab ni Hanna.
Gitug-an nga battered wife siya, ginapasakitan siya matag higayon nga hubog ug wala usab masayod ang biktima kung unsay hinungdan ngano ginabun-og siya sa iyang bana.
Samtang bun-og usab ang nahiaguman sa bana sud sa prisohan sa Sasa Police Station human gisumbag sa mga piniriso
Sa pakighinabi sa DXDC RMN Davao News Team, giingon sa asawa nga andam gihapon siya mudawat sa iyang bana kung mangayo og pasaylo kaniya sa ngalan sa ilang gugmang gipanumpaan ug sa ilang mga anak, samtang misaad usab ang bana nga dili na niya bun-ugon ang iyang misis kung makagawas sa presohan.
RadyoMaN Joel Viray
