Davao City – Gipasang-at na ngadto sa City Prosecutor’s Office ang kasong parricide batok sa suspek kinsa mibunal og tubo-patay sa iyang misis sa Prk. 3-A B57 L1 Regner Relocation, Tibungco ning syudad sa Davao.
Sa interbyu sa DXDC Rmn Davao kang Bunawan PNP Station commander PCI Estrello Ramiso base sa ilang imbestigasyon selos ug dumot ang nahimong motibo sa krimen.
Katorse katuig na nga kasado ang magtiayon nga sila Sheilla Mae Pacudan ug ang suspek nga si Reynante Pacudan ug aduna kiniy lima ka mga anak nga pulos mga menor de edad.
Pag-uli sa biktima gikan sa recognition sa ilang ikaduhang anak nagkapisikalay ang magtiayon.
Ningitngit ang panan-aw sa suspek hinungdan nga gipuspusan niini ang iyang asawa.
Nakuha sa mga kapulisan sa crime scene ang tubo nga gigamit sa suspek sa pagbokbok sa biktima.
Samtang dako ang pagmahay sa suspek sa iyang gihimong krimen ngadto sa iyang asawa.
Pasumangil sa suspek nagtapun-og na ang iyang pagdumot ngadto sa biktima kinsa mas aduna pay panahon sa iyang barkada inay sa iyaha ug sa ilang mga anak ug nasayran pa niini nga aduna kiniy laing lalaki.
Dili usab kadawat ang ugangan sa gihimo sa iyang anak ngadto sa iyang umagad.
Matud ni Teresa Yongson, sa ulahi nilang pag-istorya ni Shiella nisangpit pa kini og tabang kinsa kritikal na ang kondisyon sa balay tambalanan una pa man kini nabugtuan og kinabuhi sa Southern Philippines Medical Center.
Samtang, sa balay sa pamilya ni Sheilla sa Prk 19, Bolton Isla, Brgy. 76-A Bucana na kini hayaon.
RadyoMaN Aimee Guinita
