Bana nga nagpatay sa iya asawa sa banwa sang Cauayan pabaya nga klase amay suno sa subang nga bata

28

Pabaya nga klase amay. Amo ini ang paglaragway ni Edcil Mediona Basanta, 28-anyos sa iya amay nga si Eduardo Mediona, 58, nga nagpatay sa iya iloy nga si Priscila sa Purok 1, Brgy. Yao-yao, banwa sang Cauayan, Enero 13.

Si Edcil ang kamagulangan nga bata nanday Priscila kag Eduardo kag may apat ini ka mga manghod. May bana na karun si Edcil kag may tatlo naman ka mga kabataan, samtang ang duha ka nagasunod sa iya ang may mga pamilya naman. Ang iya naman duha pa ka manghod nga Grade 7 kag Grade 6 sa iya naga-istar sa Purok Kambaga, Brgy. Yao-yao. Ang ila amay nga isa man ka barangay tanod, ang nagaisahanon na lang nga naga-istar sa Purok 1.


Suno kay Edcil, nagdako sila nga pabaya ang ila amay kag wala nagapaninguha para sa ila pamilya. Ang ila iloy ang nagpa-Manila sang 2019 kag nangin kabulig agud may isagod sa iya mga manghod. Apisar sang batasan sang ila amay, ginapadal-an ini sa gihapon sang kwarta sang ila iloy, bangud palangga niya ini kag ang kwarta ang plano tani nga ipakaayo sang ila balay.

Ginpapauli ni Edcil ang iya iloy sang Disyembre 2020 bangud nga nagmasakit ini. Sa Purok Kambaga nag-deretso ang ila iloy kag didto nag-home quarantine, apang sang Disyembre 13 sang nagpauli ini sa Purok 1, ginbuno kag ginlaslas ang liog sini sang iya bana bangud sang away sa wala nila nakaayo nga balay.

[image: image.png]

Facebook Comments