Sa interview sa DXDC RMN Davao kang Carlo Sapidan, 30 anyos, iyahang gisaysay nga niadto pang September 2023 nawala ang iyang asawa nga si Agnes Linsag Sapidan, 27 anyos. Matud niya nga nananghid pa nga magpa-check up sa Mati ang iyang asawa ug didto nakitulog sa ilang paryente. Apan pagkaugma, nag-text na lamang kini ug miingon nga naa na sya sa Davao ug nanrabaho, rason nga gikasuko sa iyang bana tungod kay wala kini nananghid. Sukad niadto, wala na niya na-contact pa ang iyang asawa.
Buot karon sa bana nga mouli ang iyang asawa ilabi na nga dunay silay tulo ka mga anak nga pulos mga menor de edad, diin ang usa nagkasakit pa. Naundang usab sa pagpanagat ang bana tungod kay walay laing makabantay sa ilang mga anak.
“Ang iyahang i-priority unta ang iyahang mga anak. Sa akoa lang, kung unsa man ang iyang nabuhat nga kamalian, wala nako ana. Dili na ko ana maghabol. Ang akoa lang nga mouli siya alang-alang sa iyang mga anak,” panawagan sa bana.
Sa mga adunay kasayuran sa nahimutangan ni Agnes Sapidan, mamahimong i-contact ang iyahang bana sa 0953-302-1962 o kaha makig-alayon dinhi sa DXDC RMN Davao.
RadyoMaN Kirby Manzon
